Ponte de Todos os Santos

Informámosvos de que o luns 31 de outubro non haberá actividade na Asociación Coruñesa de Esclerose  Múltiple pola ponte de Todos os Santos.

Retomamos as actividades o mércores 2 de novembro.

Axudas técnicas para a comunicación: MAGICEYE

O pasado xoves 27 de outubro a nosa terapeuta ocupacional, Candela Presedo Sánchez, estivo presente na presentación do dispositivo MAGICEYE realizado en AGAELA, do que deixamos un vídeo para que vexades o seu funcionamento.



Os asistentes á presentación valoraron moi positivamente este novo dispositivo tras probalo con 5 persoas distintas, un afectado de ELA e mesmo unha persoa cun so ollo e gafas. Según nos informan dende AGAELA, concordando coa terapeuta Candela Presedo, as vantaxes deste dispositivo son que a calibraxe para a súa utilización é rápida e precisa e so é preciso calibralo unha vez, a diferencia doutros dispositivos onde cada vez que se van a utilizar hai que volver a calibrar. Outra vantaxe é que a habilidade para mover o cursor adquírese rapidamente e, a máis interesante a nivel económico é o prezo: 2.500 euros.

Lembrámosvos que para calquera dúbida arredor de axudas técnicas podedes dirixirvos á Asociación no teléfono 981 240 985 e poñémosvos en contacto coa terapeuta ocupacional para que vos informe e aconselle.

Visita de Francisco Jorquera e Xosé Manuel Carril

Hoxe recibimos no Centro Municipal Asociativo Domingo García Sabell todas as asociacións a Francisco Jorquera (candidato do BNG ao Congreso) e a Xosé Manuel Carril (portavoz municipal do BNG). Falamos con eles sobre a problemática das enfermidades crónicas e/ou raras e manifestaron o seu interese sobre o día a día dos afectados por estas enfermidades.

Expresaron así mesmo o seu convencemento de que o que interesa a día de hoxe é potenciar as políticas sociais e non recortalas, para así manter o Estado de Benestar que acadamos.

Ligazóns en prensa:

La Opinión
Europapress
BNG-Galiza

Nova fisioterapeuta en ACEM

Informámosvos que a través dos Plans de  Cooperación, contratamos a unha nova fisioterapeuta que estará con nós ata o mes de xullo.

De novo lembrámosvos que se queredes recibir o servizo de fisioterapia vos poñades en contacto coa Asociación a través do teléfono 981 240  985.

Lotería de Nadal

Informámovos que xa temos lotería de nadal. Coma todos os anos, xogamos o mesmo número o 30722. Podedes pasar a mercar a vosa participación nas oficinas de ACEM. Cada participación custa 5 euros, cun donativo de 1 euro para a Asociación Coruñesa de Esclerose Múltiple.

Animádevos que desta vez a sorte está do noso lado!!

I Trofeo Solidario Padel

Cando aínda se está celebrando o I Trofeo Solidario de Fútbol  xa vos informamos que esta fin de semana (sábado 15 e domingo 16) dende as 15:00 ata as 22:30 horas celebrarase nas instalacións de Padelplus en Culleredo, o I Trofeo Solidario de Padel.

As parellas pódense inscribir na páxina de Padelplus. Agardámosvos esta fin de semana!

Engadido: temos que informar que o torneo foi suspendido por motivos alleos a FEGEREC, máis información aquí e no teléfono de FEGEREC 981 234 651.

Torneo solidario de Fútbol

Este mércores, 12 de outubro, organízase un Torneo Solidario de Fútbol. Os beneficios serán para FEGEREC e Padre Rubinos. Contamos coa colaboración do Rotary Club e AFAC.

O Torneo comezará ás 10:00h no campo de fútbol Carlos Víctor Fernández Alonso (antiga Leyma). As entradas custarán 2 euros e pola tarde, ao final da xornada, farase un sorteo entre os asistentes.

Agardámosvos!

Programa sobre a Esclerose Múltiple

Poñémosvos unha ligazón ao programa emitido onte en Para todos La 2 sobre a esclerose múltiple. Nel falan os neurólogos Xavier Montalbán e Pablo Villoslada, do Hospital Vall d´Hebron e Hopital Clinic respectivamente. Tamén falan Mario Juez, afectado de esclerose múltiple e Rosa María Estrany, presidenta da Fundació Esclerosi Múltiple.

Esta é a ligazón ao programa:

http://www.rtve.es/alacarta/videos/para-todos-la-2/para-todos-2-esclerosis-multiple/1213554/

Torneos benéficos de FEGEREC

O ano pasado FEGEREC (Federación Gallega de Enfermidades Raras e Crónicas) organizou o I Torneo Fútbol 7 para recadar fondos que repercutirán nos servizos asistenciais que prestan ás asociacións membros. Este ano repítese e aumentan os Torneos benéficos, abarcando máis deportes. Celebraranse todos ao longo deste mes de outubro.

Venres 7 de outubro. Polideportivo San Francisco Javier (A Coruña)
Torneo Benéfico Balonmán


10:00- Minibalonmán para os máis pequenos
11:00- Balonmán infantil (en campo grande), onte tamén participarán os alevíns e infantil provincial.
12:00- Balonmán cadete e xuvenil.
13:00- CONSLAR OAR PRIMEIRA DIVISIÓN-BM PONTEDEUME

As entradas poderán adquirise no Polideportivo o mesmo día e agradecermos a vosa asistencia, así como a colaboración do Club Oar.

A seguinte cita será o mércores 12 de outubro no Torneo Benéfico de Fútbol Base, onde contamos coa colaboración de AFAC (Asociación de Fútbol Aficionado de A Coruña).

Se alguén quere colaborar como voluntario nestas actividades podedes chamar ao teléfono de ACEM 981 240 985 ou ao de FEGEREC 981 234 651.